ຫລວງ ​ພະບາງ: ວາງສີລາລືກໂຄງການ​ກໍ່ສ້າງ

ມະຫາວິທະຍາໄລກະສິກຳແລະປ່າໄມ້​ພາກເຫນືອ

ໃນອາທິດຜ່ານມາຢູ່ໂຮງຮຽນກະເສດປາກເຊືອງແຂວງຫລວງພະບາງໄດ້ມີພິທີວາງສີລາລືກໂຄງການສະຫນັບສະຫນູນແຜນການປັບປຸງວິທະຍາໄລກະສິກຳແລະປ່າໄມ້ພາກເຫນືອໂດຍການເຂົ້າຮ່ວມຂອງທ່ານສີຕາເຮັ່ງຣາຊະພົນລັດຖະມົນຕີກະຊວງກະສິກຳແລະປ່າໄມ້, ທ່ານສາຍສະຫມອນຄົມທະວົງຮອງເຈົ້າແຂວງໆຫລວງພະບາງ, ມີຜູ້ຕາງຫນ້າໂຄງການສຸຣາບໂກ (SURAFCO), ບັນດາພະແນກການທີ່ກ່ຽວ ຂ້ອງ, ຄູ - ອາຈານແລະນັກສຶກສາພາຍໃນໂຮງຮຽນດັ່ງກ່າວເຂົ້າຮ່ວມ.

ໃນພິທີອາຈານທອງສະຫມຸດພູມມະສອນອຳນວຍການວິທະຍາໄລກະສິກຳແລະປ່າໄມ້ພາກເຫນືອກໍ່ໄດ້ລາຍງານສະພາບການຈັດຕັ້ງປະຕິບັດໂຄງການເບື້ອງຕົ້ນວ່າ: ໂຄງການກໍ່ສ້າງພື້ນຖານໂຄງລ່າງຂອງວິທະຍາໄລລວມມີແຜນທີ່ການນຳໃຊ້ທີ່ດິນຊຶ່ງແຍກເປັນເຂດທີ່ດິນທຳການຜະລິດ (ຟາມ), ເຂດທີ່ຕັ້ງອາຄານຮຽນສຳລັບນັກສຶກສາ, ເຂດທີ່ຕັ້ງອາຄານບໍລິຫານ, ເຂດທີ່ຢູ່ອາໄສຂອງນັກຮຽນ, ຄູ - ອາຈານແລະເຂດສະຫນາມກິລາ. ການກໍ່ສ້າງຄັ້ງນີ້ລວມມີອາຄານຮຽນ 8 ຫ້ອງ. ຫ້ອງທົດລອງ 2 ຫ້ອງ, ຫໍພັກນັກຮຽນ 2 ຫລັງສາມາດບັນຈຸນັກຮຽນໄດ້ທັງຫມົດ 128 ຄົນ, ເຮືອນຄູ - ອາຈານທີ່ດູແລໃກ້ຊິດນັກຮຽນ 2 ຫລັງ, ຫໍອາຫານ 1 ຫລັງສາມາດຮັບຮອງນັກຮຽນໄດ້ 200 ຄົນ. ນອກນັ້ນຍັງໄດ້ປັບປຸງລະບົບນ້ຳກິນ, ນ້ຳໃຊ້ໃນການກະເສດຕື່ມອີກໂດຍໄດ້ຮັບທຶນສະຫນັບສະຫນູນຈາກໂຄງການ SURAFCO ຈຳນວນ5 ລ້ານ7 ແສນກວ່າສະວິດຝຣັງ (CHF) (ສະກຸນເງິນຂອງປະເທດສະວິດ). ນອກນັ້ນຍັງມີງົບປະມານສຳລັບການພັດທະນາພື້ນຖານໂຄງລ່າງຟາມຂອງວິທະຍາໄລເພື່ອຮອງຮັບການເຮັດພາກປະຕິບັດຕົວຈິງຂອງນັກຮຽນຈຳນວນ 4 ແສນກວ່າສະວິດຝຣັງອາຄານດັ່ງກ່າວຄາດ ວ່າຈະໄດ້ເປີດນຳໃຊ້ໃນທ້າຍເດືອນກຸມພາ 2011 ທີ່ຈະມາເຖິງນີ້.