ທ. ປາລິຖາ ແລະ ນ. ພອນນາລີ 2 ນັກຢູໂດທີມຊາດລາວ ບິນໄປເກັບຕົວຝຶກຊ້ອມທີ່ ມະຫາວິທະຍາໄລເຄນຣິ ປະເທດຍີ່ປຸ່ນ ຈົນເຖິງເດືອນ ພະຈິກ ເພື່ອກຽມຄວາມພ້ອມໃສ່ ຊີເກມສ໌ ຄັ້ງທີ24 ທີ່ປະເທດໄທ ທ້າຍປີນີ້

ອີງຕາມຂໍ້ມູນຈາກສະຫະພັນຢູໂດແຫ່ງຊາດ ແຈ້ງໃຫ້ກັບ ນ.ສ.ພ ຂ່າວກິລາ ຊາບໃນຕອນບ່າຍວານນີ້ ວ່າ: ສະຫະພັນໄດ້ສົ່ງນັກກິລາທີມຊາດ 2 ຄົນເຊິ່ງປະກອບມີ ທ. ປາລິຖາ ພົມມາລາ ແລະ ນ. ພອນນາລີ ໄຊຍະລາດ ໄປເກັບຕົວຝຶກຊ້ອມຫາປະສົບການ ຮ່ວມກັບນັກກິລາຍີ່ປຸ່ນທີ່ ມະຫາວິທະຍາໄລເຄນຣິ.
ເຊິ່ງເປັນມະຫາວິທະຍາໄລ ອັນດັບສອງຂອງຍີ່ປຸ່ນ ແລະ ພາຍໃນເດືອນ ພະຈິກ ທັງສອງຄົນຈະໄດ້ເຂົ້າຮ່ວມຊີເກມສ໌ ຄັ້ງທີ 24 ທ້າຍປີນີ້ທີ່ ປະເທດໄທ. ຫຼັງຈາກຊີເກມສ໌ ຄັ້ງທີ່24 ສຳເລັດ, ທັງສອງກໍ່ຈະບິນໄປເກັບຕົວຕໍ່ທີ່ຍີ່ປຸ່ນ ເພື່ອກະກຽມສູ່ຊີເກມສ໌ຄັ້ງທີ 25 ປີ 2009 ທີ່ ສ.ປ.ປ.ລາວ ຮັບໜ້າທີ່ເປັນເຈົ້າພາບ ຕໍ່ໄປ

ນອກຈາກນີ້ ສະຫະພັນຢູໂດ ຍັງແຈ້ງໃຫ້ຊາບຕື່ມອີກວ່າ: ຈະສົ່ງນັກກິລາລຸ້ນເຍົາວະຊົນ 14, 17 ແລະ 20 ປີ ຈຳນວນ 10ກວ່າຄົນ, ເຊິ່ງນຳທີມໂດຍທ່ານ ຈິດຕິເວດ ນວນໄຄສີ, ເປັນຫົວໜ້າຄະນະ ແລະ ໂຄ໋ຊຊາວຍີ່ປຸ່ນ ທ່ານ ຊິນໂກະ ອີໂຕະ ເພື່ອເຂົ້າຮ່ວມການແຂ່ງຂັນຢູໂດ ເຍົາວະຊົນ-ຊາວໜຸ່ມ ຊິງແຊ໋ມປະເທດໄທ ຄັ້ງທີ 11 ທີ່ບາງກອກ ປະເທດໄທ ລະຫວ່າງວັນທີ 7-9 ເມສານີ້

source: laosportfc