ປະຊາຊົນນັບເປັນແສນໆຄົນ ໃນນະຄອນຫລວງວຽງຈັນ ຈະມີໂອກາດໄດ້ນັ່ງລົດເມໂດຍສານ ຕາມສາຍທາງຕ່າງໆໄປຈົນເຖິງ 11 ໂມງກາງຄືນ.ເຊິ່ງ ສປປ ລາວ ຍັງບໍ່ທັນມີຮູບແບບການ ບໍລິການຜູ້ໂດຍສານນີ້ມາກ່ອນ ນັບຕັ້ງແຕ່ປີ1975 ຕໍ່ກັບບັນຫາການປະຕິຮູບລະບົບຄົມມະນາ ຄົມຫລາຍຮູບແບບສຳລັບຜູ້ໂດຍສານນັ້ນ ທ່ານ ລິດສະໄຫມ, ຜູ້ຊ່ວຍອຳນວຍການຂອງບໍລິ ສັດທົງລີປາຊີ-ຂົນສົ່ງໂດຍສານຈຳກັດໃຫ້ທັດສະນະວ່າ: ນັບຕັ້ງແຕ່ເດືອນສິງຫາ 2007ຈະມາ ເຖິງນີ້ ທາງບໍລິສັດຂອງພວກເຮົາຈະເລີ່ມໃຊ້ລົດເມຂະຫນາດ 20 ບ່ອນນັ່ງ ຈຳນວນ 36 ຄັນ ແລ່ນທົ່ວນະຄອນຫລວງວຽງຈັນທັງກາງເວັນ ແລະ ກາງຄືນ ເພື່ອຕອບສະຫນອງຄວາມຮຽກ ຮ້ອງຕ້ອງການຂອງຜູ້ໂດຍສານທັງຄົນລາວແລະຕ່າງປະເທດ. ໃນຈຳນວນລົດເມ 36 ຄັນທີ່ ໄດ້ນຳເຂົ້າຈາກ ສປ ຈີນ. ກຳລັງເລັ່ງໃສ່ຈະໃຊ້ແລ່ນໃນ 4 ເສັ້ນທາງຫລັກຂອງ 7 ຕົວເມືອງ ທົ່ວນະຄອນຫລວງວຽງຈັນ ເພື່ອໃຫ້ປະຊາຊົນໄດ້ທ່ອງທ່ຽວໄປ-ມາ ມີຄວາມສະດວກສະບາຍ ຂຶ້ນຕື່ມຕະຫລອດທັງການຕິດຕໍ່ຄ້າ-ຂາຍ. ນອກນັ້ນ ທາງບໍລິສັດພວກເຮົາຍັງໄດ້ກຳນົດນະໂຍ ບາຍວ່າ: ຈະຕ້ອງຄວບຄຸມຄ່າປີ້ໂດຍສານໃຫ້ຢູ່ສູງສຸດປະມານ 3.000 ກີບ ລົງມາເທົ່ານັ້ນ ເພື່ອຮັບປະກັນວ່າຜູ້ທຸກຍາກກໍສາມາດໃຊ້ບໍລິການໄດ້.

   ທ່ານ ອະທິບາຍວ່າ: ຮູບແບບການບໍລິການນີ້ຈະເປັນລັກສະນະແບບໃຫມ່ໃນ ສປປ ລາວ ກໍວ່າໄດ້ ເພາະວ່າພວກເຮົາຈະເປີດໃຫ້ລົດເມແລ່ນແຕ່ 6 ໂມງເຊົ້າ ຈົນເຖິງ 11ໂມງກາງຄືນ ໂດຍເວລາຈະຫມູນວຽນປ່ຽນກັນ ຫມາຍວ່າທຸກໆ 20 ນາທີ ຈະມີມາຮອບຫນຶ່ງ, ແຕ່ການ ແລ່ນກາງຄືນ ຈະໄດ້ກຳນົດເອົາພຽງສອງເສັ້ນທາງເທົ່ານັ້ນຄື: ເສັ້ນທາງດົງໂດກຈາກມະຫາວິ ທະຍາໄລແຫ່ງຊາດ ເຖິງໃຈກາງນະຄອນຫລວງ, ເສັ້ນທາງແຄມຂອງຈາກເຂດບ້ານເກົ້າລ້ຽວ ເມືອງສີໂຄດຕະບອງ ເຖິງບ້ານສວນມອນ ເມືອງສີສັດຕະນາກ.

   ປະຈຸບັນນີ້ ບໍລິສັດ ທົງລີປາຊີ-ຂົນ ສົ່ງໂດຍສານຈຳກັດ ກຳລັງສັ່ງຊື້ລົດເມໂດຍສານທັງ 45 ບ່ອນນັ່ງ ແລະ 20 ບ່ອນນັ່ງຈາກ ສປ ຈີນ ເປັນຈຳນວນ 85 ຄັນ ລວມມູນຄ່າຫລາຍ ກວ່າ 7 ຕື້ກີບ ເພື່ອມາຮັບຜູ້ໂດຍສານຢູ່ ສປປ ລາວ.

Source: Pasaxon social economic newspaper