ເຖິງແມ່ນໃນອະນາຄົດອັນໃກ້ນີ້ ສປປ ລາວ ຈະເຂົ້າສູ່ຕະຫຼາດການຄ້າເສລີອາຊຽນ ຫລື ອັຟຕາ ກໍຕາມ ຜະລິດ
ຕະພັນເບຍລາວ ເຊິ່ງແມ່ນຜະລິດຕະພັນທີ່ເກີດຈາກຄວາມຮູ້ ຄວາມສາມາດ ຢາດເຫື່ອແຮງງານຂອງຄົນລາວ ທີ່ຜະລິດ
ຂຶ້ນມາ ເພື່ອຮັບໃຊ້ປະຊາຊົນລາວ ແມ່ນຍັງຈະສືບຕໍ່ກວມເອົາຕະຫຼາດພາຍໃນ 99,5% ເພາະເຊື່ອໝັ້ນວ່າ ແຮງສະຫນັບ
ສະຫນູນຂອງປະຊາຊົນລາວ ແມ່ນຍັງຈະສືບຕໍ່ກວ້າງຂວາງກວ່າເກົ່າ.

              ກ່ຽວກັບເລື່ອງນີ້ ທ່ານ ກິດສະໜາ ວົງໄຊ ຜູ້ອຳນວຍການໃຫຍ່ບໍລິສັດເບຍລາວ ໄດ້ກ່າວເມື່ອວັນທີ 31 ກໍລະກົດ
2007 ທີ່ໂຮງແຮມລາວພລາຊາ ວ່າ: ມາຮອດມື້ນີ້ ເບຍລາວ ໄດ້ມີການຄົງຕົວ ແລະ ຂະຫຍາຍຕົວຄົບຮອບ 34 ປີ ພາຍຫຼັງ
ທີ່ໄດ້ມີການສ້າງຕັ້ງມາແຕ່ປີ 1973 ໂດຍພາຍໃຕ້ການນຳພາຂອງພັກປະຊາຊົນປະຕິວັດລາວ ແລະ ກໍເປັນບໍລິສັດທີ່ເສຍ
ພາສີ-ອາກອນລາຍໃຫຍ່ທີ່ສຸດຢູ່ໃນລາວ ພ້ອມທັງໄດ້ວ່າຈ້າງບໍລິສັດກວດສອບສາກົນມາດຳເນີນການກວດກາເປັນປະຈຳ
ເພື່ອຄວາມປອດໄສທາງດ້ານບໍລິຫານ ສ່ວນການຜະລິດແມ່ນໄດ້ເອົາໃຈໃສ່ເປັນພິເສດໃນທຸກຂັ້ນຕອນຂອງກຳມາວິທີການ
ຜະລິດ ໂດຍເຕັກໂນໂລຊີທີ່ທັນສະໄຫມ ເພື່ອເຮັດແນວໃດໃຫ້ໄດ້ມາຜະລິດຕະພັນໄດ້ຄຸນນະພາບສາກົນ ໃນນັ້ນ ລວມທັງ
ຄວາມສະອາດ ແລະ ປອດໄພຂອງຜູ້ບໍລິໂພກ ສິ່ງສຳຄັນ ດ້ານລາຄາແມ່ນໄດ້ຄວບຄຸມໃຫ້ຢູ່ໃນລະດັບທີ່ສົມເຫດສົມຜົນ ຄືຜູ້
ບໍລິໂພກສາມາດຊື້ໄດ້ ແລະ ບໍລິສັດສາມາດຂາຍໄດ້ ສະນັ້ນ ໃນ 34 ປີມານີ້ຈຶ່ງເຫັນວ່າ ເບຍລາວຄົງຕົວ ແລະ ຂະຫຍາຍ
ຕົວຕາມຈັງຫວະການຂະຫຍາຍຕົວທາງດ້ານເສດຖະກິດ ທັງມະຫາພາກ ແລະ ຈຸນລະພາກ ເຊິ່ງໃນປັດຈຸບັນ ເບຍລາວ
ມີກຳລັງການຜະລິດ 150 ລ້ານລິດຕໍ່ປີ ສຳລັບໂຮງງານຢູ່ນະຄອນຫຼວງວຽງຈັນ ແຕ່ຖ້າຫາກໂຮງງານແຫ່ງທີ 2 ຢູ່ປາກເຊ
ແຂວງຈຳປາສັກ ທີ່ມີການລົງທຶນກໍ່ສ້າງມູນຄ່າ 30 ລ້ານໂດລາສະຫະລັດສຳເລັດຢ່າງສົມບູນ ຄາດວ່າໃນເບື້ອງຕົ້ນຈະມີ
ກຳລັງການຜະລິດປະມານ 50 ລ້ານລິດຕໍ່ປີ ແນ່ນອນ ເວລານັ້ນຈະເຮັດໃຫ້ບໍລິສັດເບຍລາວ ເພີ່ມຄວາມແຂງແກ່ນ ແລະ
ສາມາດຕອບສະໜອງກັບຄວາມຮຽກຮ້ອງຕ້ອງການຂອງສັງຄົມ.


              ປັດຈຸບັນ ບໍລິສັດເບຍລາວ ນອກຈາກໄດ້ເອົາໃຈໃສ່ພັດທະນາຕະຫຼາດພາຍໃນປະເທດແລ້ວ ຍັງໄດ້ໃຫ້ຄວາມສຳ
ຄັນເປັນຢ່າງຍິ່ງຕະຫຼາດຕ່າງປະເທດ ສະນັ້ນ ຈິ່ງມີການສົ່ງອອກຕ່າງປະເທດແລ້ວຈຳນວນ 10 ປະເທດ ເຊິ່ງກໍມີຄວາມ
ຫວັງວ່າ ຈະເຮັດໃຫ້ການສົ່ງອອກເພີ່ມຂຶ້ນໃນອະນາຄົດ ແຕ່ເຖິງແນວໃດກໍຕາມ ເມື່ອທຽບໃສ່ຄວາມຮຽກຮ້ອງຕ້ອງການ
ຂອງພາຍນອກແລ້ວເຫັນວ່າຍັງໜ້ອຍ ທັງນີ້ກໍຍ້ອນພວກເຮົາຂາດງົບປະມານໂຄສະນາຢູ່ຕ່າງປະເທດ ການຕະຫຼາດກໍບໍ່
ທັນມີຄວາມພ້ອມເທື່ອ.

              ໃນອະນາຄົດອັນໃກ້ນີ້ ສປປ ລາວ ຈະເຂົ້າສູ່ ອັຟຕາ ແລະ WTO ແນ່ນອນເວລານັ້ນ ຜະລິດຕະພັນເບຍຂອງ
ຕ່າງຊາດຕ້ອງເຂົ້າຫາຕະຫຼາດພາຍໃນຂອງລາວ ຢ່າງບໍ່ຕ້ອງສົງໄສ ແລະ ຈະມີຈຳນວນຫຼາຍຂຶ້ນ ເຊິ່ງປັດຈຸບັນ ບໍລິສັດໄດ້
ກະກຽມນະໂຍບາຍຈຳນວນໜໜຶ່ງ ເພື່ອຊຸກຍູ້ອຳນວຍຄວາມສະດວກຕະຫຼາດເບຍລາວ ໂດຍສະເພາະແມ່ນມີຄວາມເຊື່ອ
ໝັ້ນວ່າ ປະຊາຊົນບັນດາເຜົ່າ ເຊິ່ງເປັນຜູ້ຮັກຫອມບ້ານເກີດເມືອງນອນ ມີມູນເຊື້ອຄວາມສາມັກຄີຢ່າງເປັນປຶກແຜ່ນ
ແໜ້ນໜາ ຍັງຄົງຈະໃຫ້ການສະໜັບສະໜູນຜະລິດຕະພັນຂອງລາວ ລາວເຮັດ ລາວໃຊ້ ລາວໄດ້ ລາວຈະເລີນ ທ່ານ ກິດ
ສະໜາ ວົງໄຊ ກ່າວຕອນທ້າຍ.

ຂໍ້ມູນຈາກ ນ.ສ.ພ ວຽງຈັນໃໝ່ - 16 ສິງຫາ 2007 11:06 ນ. 
Photo: flickr