ໂອກາດດັ່ງກ່າວນີ້ ທ່ານນາຍົກລັດຖະມົນຕີ ໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ການເດີນທາງມາຢ້ຽມຢາມ ສປປ ລາວ ແລະ ເຂົ້າຮ່ວມງານມະ ຫະກຳກີລາຊີເກມ ຄັ້ງທີ 25 ໂດຍຕອບສະໜອງຄຳເຊື້ອເຊີນຂອງລັດຖະບານລາວ ເປັນການໃຫ້ກຽດ ການສະໜັບສະໜູນ ແລະ ໃຫ້ກຳລັງໃຈແກ່ລັດ ຖະບານ ແລະ ປະຊາຊົນລາວ ຊຶ່ງການພົບປະຄັ້ງນີ້ ກ່ອນອື່ນທ່ານນາຍົກລັດຖະມົນຕີ ໄດ້ເປີດໂອກາດໃຫ້ຄະນະຜູ້ແທນດັ່ງກ່າວແຕ່ລະທ່ານໄດ້ປະກອບ ຄວາມຄິດຄວາມເຫັນ ແລະ ການປະກອບຄຳເຫັນຂອງແຕ່ລະທ່ານ ກໍເຫັນວ່າທຸກທ່ານໄດ້ສະແດງຄວາມດີອົກດີໃຈທີ່ໄດ້ມີໂອກາດເດີນທາງມາຢ້ຽມຢາມ ບ້ານເກີດເມືອງນອນຂອງຕົນອີກຄັ້ງ ​ໄດ້ຊົມເຊີຍລັດຖະບານ ແລະ ປະຊາຊົນທີ່ໄດ້​ເປັນ​ເຈົ້າພາບຈັດງານຊີເກມຄັ້ງທີ 25 ຊຶ່ງເຫັນວ່າງານຄັ້ງນີ້ ແມ່ນຈັດ ໄດ້ດີຫຼາຍ ເປັນທີ່ຍອມຮັບຂອງຫຼາຍປະເທດ ທັງໝົດນີ້ແມ່ນຍ້ອນຄວາມພະຍາຍາມ ແລະ ຄວາມສູ້ຊົນຂອງລັດຖະບານ ແລະ ຍ້ອນຄວາມສາມັກຄີເປັນ ຈິດໜຶ່ງໃຈດຽວຂອງປະຊາຊົນລາວບັນເຜົ່າ ພ້ອມນີ້ຄະນະຜູ້ແທນແຕ່ລະທ່ານຍັງໄດ້ເຊື່ອໜັ້ນຕໍ່ແນວທາງນະໂຍບາຍຂອງພັກປະຊາຊົນປະຕິວັດລາວ ໃນ ການຊີ້ນຳ-ນຳພາປະຊາຊົນສ້າງສາພັດທະນາປະເທດຊາດ ອັນໄດ້ເຮັດໃຫ້ ສປປ ລາວ ມີການພັດທະນາຢ່າງໄວວາ ບ້ານເມືອງມີຄວາມສະຫງົບ ການ ລົງທຶນນັບມື້ເພີ່ມຂຶ້ນ.

ຈາກນັ້ນ ທ່ານນາຍົກລັດຖະມົນຕີ ກໍໄດ້ໃຫ້ກຽດໂອ້ລົມ ຊຶ່ງທ່ານໄດ້ກ່າວວ່າ: ໃນນາມລັດຖະບານລາວ ຍິນດີຕ້ອນຮັບບັນດາຜູ້ແທນພີ່ນ້ອງຊາວລາວ ທີ່ ມາຈາກຫຼາຍໆປະເທດທົ່ວໂລກ ການມາຮ່ວມງານກີລາຊີເກມຂອງບັນດາພີ່ນ້ອງຊາວລາວທີ່ຢູ່ຕ່າງປະເທດ ເປັນການສະແດງເຖິງນ້ຳໃຈຕິດພັນອັນສູງ ຂອງພີ່ນ້ອງ ກັບບ້ານເກີດເມືອງນອນຂອງພໍ່ແມ່ພວກເຮົາ ທັງເປັນການໃຫ້ກຳລັງໃຈແກ່ຄະນະກຳມະການກີລາ ກໍຄືນັກກີລາຂອງພວກເຮົາ.

ນອກນີ້ແລ້ວ ທ່ານນາຍົກລັດຖະມົນຕີ ຍັງໄດ້ຍົກໃຫ້ສະພາບການພັດທະນາຂອງລາວ ສປປ ລາວ ມີສະຖຽນລະພາບທາງການເມືອງ ມີຄວາມສະຫງົບ ເສດຖະກິດມີການຂະຫຍາຍຕົວຢ່າງຕໍ່ເນື່ອງ ເຖິງແມ່ນວ່າຈະມີວິກິດການດ້ານການເງິນໂລກກໍຕາມ ອັດຕາເງິນເຟີ້ຢູ່ໃນລະດັບຕ່ຳ ການລົງທຶນຕ່າງປະ ເທດຍັງຢູ່ໃນລະດັບປົກກະຕິແລ້ວ ຍັງມີທ່າຂະຫຍາຍຕົວນັກທ່ອງທ່ຽວ ເຖິງວ່າຈະຖືກກະທົບຈາກພາຍນອກ ແຕ່ກໍຍັງຢູ່ໃນຈຳນວນທີ່ນັບວ່າສູງ ສຳຄັນ ແມ່ນລັດຖະບານມີນະໂຍບາຍຊຸກຍູ້ການຜະລິດພາຍໃນທີ່ເລີ່ມແຕ່ພື້ນຖານປະຊາຊົນຂຶ້ນໄປ ລັດຖະບານຖືເປັນບູລິມະສິດທຳອິດເພື່ອຫຼຸດຜ່ອນຄວາມທຸກ ຍາກຂອງປະຊາຊົນ ກ້າວໄປເຖິງລົບລ້າງໄດ້ໃນປີ 2015 ແລະ ເອົາປະເທດອອກຈາກສະພາບດ້ອຍພັດທະນາ ໃນປີ 2020 ຢ່າງຊ້າ ຍ້ອນເສດຖະກິດ ມີການຂະຫຍາຍຕົວ ພວກເຮົາຈຶ່ງສາມາດປັບປຸງ ແລະ ຂະຫຍາຍວຽກງານວັດທະນະທຳ ການສຶກສາ ສາທາລະນະສຸກຂອງປະຊາຊົນໃຫ້ດີຂຶ້ນເປັນ ກ້າວໆ ລັດຖະບານເອົາໃຈໃສ່ພິເສດໃນການສ້າງຄົນລຸ້ນໜຸ່ມໃຫ້ມີການສຶກສາດີ ທັງເປັນພົນລະເມືອງດີ.

ນະໂຍບາຍຕໍ່ຄົນເຊື້ອຊາດລາວຢູ່ຕ່າງປະເທດ ລັດຖະບານລາວບໍ່ຖືເອົາອະດີດມາເປັນມາດຖານ ເພື່ອອະນາຄົດ ລັດຖະບານລາວ ເປີດປະຕູເປີດໂອກາດ ແລະ ສ້າງຄວາມສະດວກໃຫ້ພີ່ນ້ອງຊາວລາວທີ່ອາໄສຢູ່ຕ່າງປະເທດ ໃຫ້ສາມາດກັບຄືນມາສູ່ປະເທດຊາດ ປະກອບສ່ວນຕາມຄວາມສາມາດຂອງແຕ່ລະ ຄົນ ຖ້າພວກເຮົາຮ່ວມພະລັງຈິດໃຈ ແລະ ຄວາມສາມາດເປັນກຳລັງອັນແໜ້ນແກ່ນຊາດ ພວກເຮົາຈະຕ້ອງຂະຫຍາຍຕົວ ຄຽງຄູ່ກັບປະຊາຄົມໂລກໄດ້.

ນອກນີ້ ທ່ານນາຍົກລັດຖະມົນຕີ ຍັງໄດ້ຝາກຄວາມຄິດເຫັນ ຊຶ່ງທ່ານໄດ້ກ່າວວ່າ: ຂໍໃຫ້ພີ່ນ້ອງຊາວລາວທີ່ຢູ່ຕ່າງປະເທດ ຈະມີສັນຊາດໃໝ່ ຫຼືມີຖານະ ອື່ນໆ ຈົ່ງເປັນພົນລະເມືອງດີຂອງປະເທດນັ້ນໆ ຄົ້ນຄ້ວາຮ່ຳຮຽນເອົາປະສົບການ ແລະ ຄວາມກ້າວໜ້າຂອງເຕັກໂນ​ໂລຊີ ແລະ ຄົ້ນຄ້ວາເບິ່ງຄວາມ ອາດສາມາດໃນການນຳມາໝູນໃຊ້ຢູ່ປະເທດເຮົາ ສຶກສາອົບຮົມຄົນລຸ້ນໜຸ່ມ ແລະ ລູກຫຼານໃຫ້ມີການສຶກສາດີ ແລະ ໃຫ້ສືບຕໍ່ຮັກສາວັດທະນະທຳ ແລະ ຮີດຄອງປະເພນີອັນດີງາມຂອງລາວເຮົາ ພ້ອມທັງສ້າງເງື່ອນໄຂໃຫ້ເຂົາເຈົ້າໄດ້ໄປມາຫາສູ່ກັນທາງບ້ານ.

ແລະສຸດທ້າຍນີ້ ທ່ານນາຍົກລັດຖະມົນຕີ ຍັງໄດ້ອວຍພອນໄຊໃຫ້ຄະນະຜູ້ແທນດັ່ງກ່າວ ຈົ່ງມ່ວນຊື່ນຕະຫຼອດໄລຍະຢ້ຽມຢາມລາວ ແລະ ໃຫ້ເດີນທາງ ກັບດ້ວຍຄວາມສະຫວັດດີພາບ.