ມະຫາວິທະຍາໄລທຳມະສາດຂອງໄທ ຂໍໂທດຄົນລາວ
ວັນທີ 01 ເມສາ 2011 - ເວລາ 16:06:51 ສົ່ງຂ່າວນີ້ໃຫ້ເພື່ອນ ພິມຂ່າວນີ້

ຕອນ​ເຊົ້າ​ວັນ​ທີ 25 ມີ­ນາ 2011 ຜ່ານ​ມາ ທີ່​ສະ­ຖານ​ເອກ​ອັກ​ຄະ​ລັດ​ຖະ​ທູດ ແຫ່ງ ສປປ ລາວ ທີ່​ບາງ­ກອກ ທ່ານ​ຜູ້​ຊ່ວຍ​ສາ​ສະ​ດາ​ຈານ ດຣ.ປະ​ຣິນ​ຍາ ເທ­ວາ​ນະ​ຣຶ​ມິດ​ຕະ­ກຸນ ຮອງ​ອະ­ທິ­ການ​ບໍ­ດີ​ຝ່າຍ​ການ​ນັກ​ສຶກ​ສາ​ຂອງ​ມະ­ຫາ­ວິ­ທະ­ຍາ­ໄລ​ທຳ​ມະ​ສາດ ໄດ້​ນຳ​ເອົາ​ຈົດ­ໝາຍ​ຂອງ​ທ່ານ ສຈ.ດຣ.ສົມ​ຄິດ ເລີດ​ໄພ­ທູນ ອະ­ທິ­ການ​ບໍ­ດີ​ມະ­ຫາ­ວິ­ທະ­ຍາ­ໄລ​ທຳ​ມະ​ສາດ ມາ​ມອບ​ໃຫ້​ເອກ​ອັກ​ຄະ​ລັດ​ຖະ​ທູດ​ລາວ ປະ­ຈຳ​ຣາ​ຊະ​ອາ­ນາ­ຈັກ​ໄທ ທ່ານ ອ້ວນ ພົມ​ມະ​ຈັກ ເພື່ອ​ສະ­ແດງ​ຄວາມ​ຂໍ​ໂທດ​ປະ­ຊາ­ຊົນ​ລາວ ໃນ​ກໍ­ລະ­ນີ​ທີ່​ນັກ​ສຶກ​ສາ​ກຸ່ມ​ໜຶ່ງ ປະ­ກອບ​ມີ​ນາງ ມຸ­ທິ­ຕາ ຂຽວ​ຫວານ ນາງ ວັນ­ນະ​ດີ ວົງ​ວຸດ​ທິ​ວັດ ນາງ ນຸ​ສະ​ຣາ ຊ່ວຍ​ປັນ­ຍາ ໂດຍ​ມີ​ອາ­ຈານ ຊົງ​ຍົດ ແວວ​ຫົງ ເປັນ​ຜູ້​ກຳ­ກັບ​ການ​ຂຽນ​ເລື່ອງ ໃນ​ຫົວ­ຂໍ້: ລາວ???.



ໃນ​ຄຼິບ​ວິ​ດີ​ໂອ​ທີ່​ມີ​ຄວາມ​ຍາວ 11,55 ນາ­ທີ ເລີ່ມ​ຕົ້ນ​ດ້ວຍ​ສຽງ​ຜູ້­ຍິງ​ຢອກ​ໄຍ​ກັນ​ເປັນ​ພາ­ສາ​ໄທ ແລະ ຂຽນ​ວ່າ: ອີ່​ລາວ ໄອ້​ລາວ! ແຕ່ງ​ຕົວ​ກໍ​ລາວ! ແລະ ອື່ນໆ ພ້ອມ​ທັງ​ນຳ​ເອົາ​ການ​ສຳ­ພາດ​ຊາວ​ໜຸ່ມ​ນັກ​ສຶກ​ສາ​ຫຼາຍ​ຄົນ​ທີ່​ເຄີຍ​ໃຊ້​ຄຳ​ວ່າ “ລາວ” ເປັນ​ຄຳ​ເອີ້ນ​ສະ­ເພາະ​ຕໍ່​ຜູ້​ທີ່​ມີ​ຄວາມ​ດ້ອຍ​ພັດ­ທະ­ນາ​ຫຼ້າ­ຫຼັງ​ຕ່າງໆ ຊຶ່ງ​ທາງ​ມະ­ຫາ­ວິ­ທະ­ຍາ­ໄລ​ທຳ​ມະ​ສາດ ເຫັນ​ວ່າ ເປັນ​ຄຳ​ເວົ້າ​ທີ່​ບໍ່​ເໝາະ​ສົມ ແລະ ຂາດ​ຄວາມ​ເຄົາ­ລົບ​ຕໍ່​ປະ­ຊາ­ຊົນ​ລາວ ພ້ອມ​ທັງ​ສະ­ເໜີ​ໃຫ້​ຄົນ​ໄທ ຢຸດ­ຕິ​ການ​ກະ­ທຳ​ອັນ​ບໍ່​ເໝາະ​ສົມ​ດັ່ງ­ກ່າວ.



ເນື້ອ​ໃນ​ຈົດ­ໝາຍ​ຂໍ​ອະ­ໄພ­ໂທດ ມີ​ດັ່ງ­ນີ້: ຕາມ​ທີ່​ໄດ້​ມີ​ການ​ເຜີຍ­ແຜ່​ຄຼິບ​ວິ​ດີ​ໂອ​ທີ່​ມີ​ເນື້ອ​ໃນ ແລະ ວິ­ທີ​ການ​ນຳ​ສະ­ເໜີ​ກະ­ທົບ​ຕໍ່​ຄວາມ​ຮູ້­ສຶກ​ຂອງ​ປະ­ຊາ­ຊົນ​ລາວ​ຂອງ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ຊຶ່ງ​ເປັນ​ຄຼິບ​ວິ​ດີ​ໂອ ທີ່​ສ້າງ​ຂຶ້ນ​ໂດຍ​ນັກ​ສຶກ​ສາ​ມະ­ຫາ­ວິ­ທະ­ຍາ­ໄລ​ທຳ​ມະ​ສາດ​ກຸ່ມ​ໜຶ່ງ​ນັ້ນ ມະ­ຫາ­ວິ­ທະ­ຍາ­ໄລ​ທຳ​ມະ​ສາດ ໄດ້​ກວດ​ສອບ​ແລ້ວ​ເຫັນ​ວ່າ​ຄຼິບ​ວິ​ດີ​ໂອ​ດັ່ງ­ກ່າວ ຖືກ​ສ້າງ​ຂຶ້ນ​ໂດຍ​ນັກ​ສຶກ​ສາ​ກຸ່ມ​ໜຶ່ງ ເພື່ອ​ສົ່ງ​ໃຫ້​ອາ­ຈານ​ໃນ​ວິ­ຊາ​ຮຽນ​ວິ­ຊາ​ໜຶ່ງ (ວິ­ຊາ​ສະ­ຫະ​ວິ­ທະ­ຍາ​ການ​ມະ­ນຸດ​ສາດ) ໂດຍ​ມີ​ເຈດ​ຕະ​ນາ​ນຳ​ສະ­ເໜີ​ບັນ­ຫາ​ທີ່​ຄົນ​ໄທ​ຈຳ­ນວນ​ໜຶ່ງ​ໃຊ້​ຄຳ​ວ່າ “ລາວ” ໂດຍ​ບໍ່​ເໝາະ​ສົມ ແລະ ຂາດ​ຄວາມ​ເຄົາ­ລົບ​ຕໍ່​ປະ­ຊາ­ຊົນ​ລາວ ໃນ​ຖາ­ນະ​ທີ່​ເທົ່າ​ທຽມ​ກັນ ທັງ​ນີ້​ກໍ​ເພື່ອ​ປຸກ­ລະ­ດົມ​ໃຫ້​ຄົນ​ໄທ ທີ່​ມີ​ພຶດ­ຕິ​ກຳ​ດັ່ງ­ກ່າວ ຢຸດ​ເຊົາ​ການ​ກະ­ທຳ​ອັນ​ບໍ່​ເໝາະ​ສົມ​ນີ້ ຢ່າງ­ໃດ​ກໍ​ຕາມ ເຖິງ​ແມ່ນ​ວ່າ​ເຈດ​ຕະ​ນາ​ຂອງ​ນັກ​ສຶກ​ສາ​ກຸ່ມ​ນີ້ ຈະ​ເປັນ­ຄວາມ​ຕັ້ງ­ໃຈ​ດີ ແຕ່​ວິ­ທີ​ການ​ທີ່​ໃຊ້ ເປັນ​ວິ­ທີ​ການ​ທີ່​ບໍ່​ເໝາະ​ສົມ ແລະ ຂາດ​ຄວາມ​ລະ­ມັດ­ລະ­ວັງ​ໃນ​ການ​ນຳ​ສະ­ເໜີ.



ມະ­ຫາ­ວິ­ທະ­ຍາ­ໄລ​ທຳ​ມະ​ສາດ ຈຶ່ງ​ຂໍ​ອະ­ໄພ​ປະ­ຊາ­ຊົນ​ລາວ ທີ່​ນັກ​ສຶກ​ສາ​ຂອງ​ມະ­ຫາ­ວິ­ທະ­ຍາ­ໄລ ໄດ້​ກະ­ທຳ​ໃນ​ສິ່ງ​ທີ່​ກະ­ທົບ​ຕໍ່​ຄວາມ​ຮູ້­ສຶກ​ຂອງ​ປະ­ຊາ­ຊົນ​ລາວ ແລະ ຈະ​ໄດ້​ດຳ­ເນີນ​ການ​ຕັກ­ເຕືອນ​ນັກ​ສຶກ​ສາ ໂດຍ​ຈະ​ບໍ່​ໃຫ້​ເກີດ​ບັນ­ຫາ​ນີ້​ອີກ​ໃນ​ອະ­ນາ­ຄົດ.