ກອງ​ປະ­ຊຸມ​ຄະ­ນະ​ຜູ້​ແທນ​ຂັ້ນ​ສູງ​ຂອງ​ກະ­ຊວງ​ປ້ອງ​ກັນ​ຄວາມ​ສະ­ຫງົບ​ ແຫ່ງ ສປປ ລາວ ແລະ ກະ­ຊວງ​ພາຍ​ໃນ ແຫ່ງ ຣາ​ຊະ​ອາ­ນາ ຈັກ​ກຳ­ປູ­ເຈຍ ໄດ້​ຈັດ​ຂຶ້ນ​ລະ­ຫວ່າງ​ວັນ​ທີ ໒໓-໒໖ ພຶດ­ສະ­ພາ ໒໐໑໑ ທີ່​ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ດຣ.ທອງ​ບັນ ແສງ​ອາ­ພອນ ລັດ­ຖະ­ມົນ­ຕີ​ວ່າ­ການ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ເປັນ​ປະ­ທານ​ຮ່ວມ​ຝ່າຍ​ລາວ ແລະ ທ່ານ ຊໍ​ເຄັງ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ວ່າ­ການ​ກະ­ຊວງ​ພາຍ​ໃນ ເປັນ​ປະ­ທານ​ຮ່ວມ​ຝ່າຍ​ກຳ­ປູ­ເຈຍ.

ຄະ­ນະ​ຜູ້​ແທນ​ເຂົ້າ​ຮ່ວມ​ກອງ​ປະ­ຊຸມ​ປະ­ກອບ​ດ້ວຍ​ເຈົ້າ­ແຂວງ​ຂອງ​ລາວ ໒ ແຂວງ ຄື: ແຂວງ​ຈຳ­ປາ​ສັກ ແລະ ແຂວງ​ອັດ​ຕະ​ປື ເຈົ້າ­ແຂວງ​ຂອງ​ກຳ­ປູ­ເຈຍ ໓ ແຂວງ ຄື: ແຂວງ​ສະ​ຕຶງ​ແຕຼງ ແຂວງ​ເປຼັຍ​ວີ​ເຮັຍ ແຂວງ​ຣັດ​ຕະ​ນະ​ຄີ­ລີ ພ້ອມ​ດ້ວຍ​ຜູ້​ແທນ​ຈາກ​ພາກ­ສ່ວນ​ຕ່າງໆ​ທີ່​ກ່ຽວ­ຂ້ອງ​ຂອງ​ທັງ​ສອງ​ຝ່າຍ.

ເພື່ອ​ຄວາມ​ສະ­ດວກ​ການ​ກະ­ກຽມ​ເນື້ອ​ໃນ​ໃຫ້​ແກ່​ກອງ​ປະ­ຊຸມ​ຄະ­ນະ​ຜູ້​ແທນ​ ຂັ້ນ​ສູງ ລະ­ຫວ່າງ​ກະ­ຊວງ ປກສ ລາວ ແລະ ກະ­ຊວງ​ພາຍ​ໃນ ແຫ່ງ ຣາ​ຊະ​ອາ­ນາ­ຈັກ​ກຳ­ປູ­ເຈຍ ກອງ​ປະ­ຊຸມ​ໄດ້​ແບ່ງ​ເປັນ ໒ ລະ­ດັບ ຄື: ກອງ​ປະ­ຊຸມ​ຄະ­ນະ​ເຈົ້າ​ໜ້າ­ທີ່​ອາ­ວຸ­ໂສ​ຮ່ວມ ລາວ-ກຳ­ປູ­ເຈຍ ແລະ ກອງ​ປະ­ຊຸມ​ຄະ­ນະ​ເຈົ້າ​ໜ້າ­ທີ່​ຂັ້ນ​ສູງ (ລັດ­ຖະ­ມົນ­ຕີ) ເຊິ່ງ​ແຕ່​ລະ​ກອງ​ປະ­ຊຸມ​ໄດ້​ປຶກ­ສາ​ຫາ­ລື​ແລກ­ປ່ຽນ​ຄວາມ​ຄິດ​ເຫັນ ແລະ ແນວ­ທາງ​ການ​ຮ່ວມ​ມື​ໃນ​ການ​ແກ້​ໄຂ​ບັນ­ຫາ​ຕ່າງໆ​ທີ່​ເກີດ​ຂຶ້ນ​ຕາມ​ ບໍ­ລິ­ເວນ​ຊາຍ​ແດນ​ຂອງ​ສອງ​ປະ­ເທດ ເສີມ​ຂະ­ຫຍາຍ​ການ​ຮ່ວມ​ມື​ໃນ​ດ້ານ​ຕ່າງໆ ດ້ວຍ​ບັນ­ຍາ­ກາດ​ແຫ່ງ​ໄມ­ຕີ​ຈິດ​ມິດ­ຕະ­ພາບ ແລະ ເຂົ້າ​ອົກ​ເຂົ້າ­ໃຈ​ຊຶ່ງ​ກັນ ແລະ ກັນ ເຊິ່ງ​ລວມ​ມີ​ບັນ­ດາ​ຫົວ­ຂໍ້​ຕ່າງໆ ຄື:

໑. ການ​ຮ່ວມ​ມື​ຮັກ­ສາ​ຄວາມ​ສະ­ຫງົບ ແລະ ຄວາມ​ເປັນ​ລະ­ບຽບ​ຮຽບ​ຮ້ອຍ​ຕາມ​ຊາຍ​ແດນ ຊຶ່ງ​ທັງ​ສອງ​ຝ່າຍ​ໄດ້​ມອບ​ໝາຍ​ໃຫ້​ເຈົ້າ​ໜ້າ­ທີ່​ກ່ຽວ­ຂ້ອງ​ທັງ​ສອງ​ຝ່າຍ​ ປະ­ສານ ແລະ ແຈ້ງ​ຂໍ້​ມູນ​ຂ່າວ­ສານ​ໃຫ້​ກັນ ແລະ ກັນ​ຊາບ ຢ່າງ​ຖືກ­ຕ້ອງ​ຊັດ​ເຈນ ເພື່ອ​ສະ­ກັດ​ກັ້ນ​ການ­ເຄື່ອນ­ໄຫວ​ຂອງ​ບຸກ­ຄົນ ແລະ ກຸ່ມ​ຄົນ​ທີ່​ບໍ່​ດີ​ໃຫ້​ທັນ​ເວ­ລາ.

໒. ການ​ຮ່ວມ​ມື​ໃນ​ການ​ປ້ອງ​ກັນ ແລະ ປາບ​ປາມ​ຢາ​ເສບ​ຕິດ­ຕາມ​ຊາຍ​ແດນ.

໓. ການ​ຮ່ວມ​ມື​ອຳ­ນວຍ​ຄວາມ​ສະ­ດວກ ແລະ ຄວາມ​ປອດ​ໄພ​ໃນ​ການ​ເຂົ້າ-ອອກ​ເມືອງ.

໔. ການ​ຮ່ວມ​ມື​ແລກ­ປ່ຽນ​ການ​ຢ້ຽມ­ຢາມ​ຂອງ​ຄະ­ນະ​ຜູ້​ແທນ​ຂັ້ນ​ສູງ.

໕. ການ​ຮ່ວມ​ມື​ດ້ານ​ການ​ກໍ່­ສ້າງ​ກຳ­ລັງ.

ນອກ­ຈາກ​ນີ້ ທັງ​ສອງ​ຝ່າຍ​ຍັງ​ປຶກ­ສາ​ຫາ­ລື​ດ້ານ​ອື່ນໆ ເຊັ່ນ: ການ​ຮ່ວມ​ມື​ໃນ​ການ​ປົກ​ປັກ​ຮັກ­ສາ​ເສັ້ນ​ຊາຍ​ແດນ​ລະ­ຫວ່າງ​ປະ­ເທດ ສະ­ໜັບ­ສະ­ໜູນ​ໃຫ້​ໜ່ວຍ​ງານ​ທີ່​ກ່ຽວ­ຂ້ອງ​ຕ້ອງ​ເລັ່ງ​ລັດ​ເພື່ອ​ຮ່ວມ​ມື​ ກັນ​ສຳ​ຫຼວດ ແລະ ປັກ​ຫຼັກ​ໝາຍ​ຊາຍ​ແດນ​ລະ­ຫວ່າງ​ປະ­ເທດ​ໃຫ້​ສຳ­ເລັດ ຕາມ​ຄາດ­ໝາຍ​ທີ່​ລັດ­ຖະ­ບານ​ຂອງ​ສອງ​ປະ­ເທດ​ໄດ້​ກຳ­ນົດ​ໄວ້ ການ​ສຶກ​ສາ​ອົບ­ຮົມ​ປະ­ຊາ­ຊົນ​ຂອງ​ຕົນ​ໃນ​ການ​ດຳ­ລົງ​ຊີ­ວິດ ແລະ ທຳ​ມາ​ຫາ​ກິນ​ຕາມ​ບໍ­ລິ­ເວນ​ຊາຍ​ແດນ​ໃຫ້​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ ແລະ ຂອບ​ເຂດ​ເສັ້ນ​ຊາຍ​ແດນ​ລະ­ຫວ່າງ​ສອງ​ປະ­ເທດ ການ​ອຳ­ນວຍ​ຄວາມ​ສະ­ດວກ ແລະ ຄວາມ​ປອດ​ໄພ​ໃນ​ການ​ເຂົ້າ-ອອກ​ເມືອງ ແລະ ດ້ານ​ອື່ນໆ ເພື່ອ​ຜົນ​ປະ­ໂຫຍດ​ຂອງ​ປະ­ຊາ­ຊົນ​ທັງ​ສອງ​ປະ­ເທດ.