ນັບວ່າເປັນຂ່າວດີ ຕໍ່ພໍ່ແມ່ປະຊາຊົນລາວບັນດາເຜົ່າທີ່ ສປປ ລາວ ເຮົາໄດ້ຮັບກຽດ ເປັນເຈົ້າພາບຈັດແຂ່ງຂັນ ບານເຕະຊີງແຊັມອາຊຽນ ຮອບຄັດເລືອກ“ຊູຊູກິ ຄັບ 2010” ຊຶ່ງກຽມຈັດຂຶ້ນໃນລະຫວ່າງວັນທີ 22-30 ຕຸລາ ນີ້.

ທ່ານ ອາຈານ ພູວັນ ວົງສຸທິ ປະທານສະຫະພັນບານເຕະ ແຫ່ງຊາດລາວ ໄດ້ແຈ້ງໃຫ້ຮູ້ວ່າ: ໃນວັນທີ 1 ພຶດສະພາຜ່ານມານີ້ ທ່ານໄດ້ໄປປະຊຸມ ຢູ່ປະເທດມາເລເຊຍ ກ່ຽວກັບກີລາບານເຕະ ໃນກຸ່ມອາຊຽນ ແລະ ທ່ານກໍໄດ້ຮັບເອົາ ການເປັນເຈົ້າພາບຈັດແຂ່ງຂັນ ບານເຕະຊູຊູກິ ຄັບ ໃນຮອບຄັດເລືອກ ພາຍຫຼັງທີ່ມີການເຫັນດີເຫັນພ້ອມ ຈາກຫຼາຍຝ່າຍ ເພາະວ່າ ສປປ ລາວ ເຮົາ ໄດ້ມີພື້ນຖານໂຄງລ່າງທີ່ດີແລ້ວ ນັບຈາກການເປັນເຈົ້າພາບ ຈັດງານມະຫະກຳກີລາຊີເກມ ຄັ້ງທີ 25 ໃນທ້າຍປີ 2009 ຜ່ານມານີ້ ທີ່ນະຄອນຫຼວງວຽງຈັນ.

ສຳລັບການແຂ່ງຂັນບານເຕະ ຊູຊູກິ ຄັບ ຮອບຄັດເລືອກນີ້ ຄາດວ່າຈະມີ 4-5 ຊາດ ມາເຂົ້າຮ່ວມແຂ່ງຂັນຄື: ສປປ ລາວ “ເຈົ້າພາບ” ຟີລິບປິນ ກຳປູເຈຍ ຕີມໍເລດ ສະເຕ ແລະ ບຣູໄນ ສະເພາະທິມຊາດ ບຣູໄນ ນັ້ນ ຍັງບໍ່ທັນແນ່ນອນ ວ່າຈະມາເຂົ້າຮ່ວມແຂ່ງຂັນໄດ້ ຫຼື ບໍ່ ເພາະຍັງຖືກສະຫະພັນ ບານເຕະນາໆຊາດ (FIFA) ລົງໂທດຢູ່.

ເຖິງແນວໃດກໍຕາມ ຂໍໃຫ້ພໍ່ແມ່ປະຊາຊົນລາວບັນດາເຜົ່າ ໄດ້ກຽມຈິດກຽມໃຈ ໄວ້ໄປໃຫ້ກຳລັງໃຈທິມຊາດລາວ ຕື່ມອີກ ເໝືອນກັບງານມະຫະກຳ ກີລາຊີເກມ ຄັ້ງທີ 25 ຜ່ານມາ ເພື່ອໃຫ້ທິມຊາດລາວ ໄດ້ຜ່ານເຂົ້າຮອບສອງຕໍ່ໄປ ໃນລາຍການແຂ່ງຂັນບານເຕະ ຊູຊູກິ ຄັບ 2010 ນີ້.