ປີ 2010 ກຳລັງຈະຫຍັບຍ້າຍຈາກໄປປີໃຫມ່ 2011 ພວມຈະຫຍັບເຂົ້າມາໃນອີກບໍ່ເທົ່າໃດຊົ່ວໂມງຂ້າງຫນ້າ. ຕະຫລອດ 1 ປີມີ ຫລາຍເຫດການທີ່ພົ້ນເດັ່ນເກີດຂຶ້ນພາຍໃນປະເທດ ແລະ ການພົວພັນລະຫວ່າງປະເທດ.

ເພື່ອເປັນການຫວນຄືນເຫດການໃນຮອບ 1 ປີ ອັນມີຄວາມຫມາຍຄວາມສຳຄັນເຊິ່ງເປັນປີມ້ວນທ້າຍຂອງແຜນພັດທະນາເສດຖະກິດ -ສັງຄົມ 5 ປີຄັ້ງທີ 6, ກ່ອນຍ່າງກ້າວເຂົ້າສູ່ປີ 2011 ປີເລີ່ມຕົ້ນແຜນພັດທະນາເສດຖະກິດ-ສັງຄົມ 5 ປີຄັ້ງທີ7; ຫນັງສືພິມເສດຖະກິດ -ສັງຄົມຈິ່ງໄດ້ຈັດລຽງ10 ອັນດັບຂ່າວເດັ່ນມາໃຫ້ທ່ານຜູ້ອ່ານໄດ້ອ່ານ ໂດຍຈະເລີ່ມຈາກອັນດັບ 10 ຫາອັນດັບ 1 ຄື:

ອັນດັບ 10

ແມ່ນເຫດການກັກໄມ້ທ່ອນ 13 ຄັນລົດຢູ່ແຂວງວຽງຈັນ ໂດຍໃນເວລາ 22 ໂມງ ຂອງຄ່ຳຄືນວັນທີ 29 ເມສາ 2010 ເຈົ້າຫນ້າທີ່ ກ່ຽວຂ້ອງຂອງແຂວງວຽງຈັນ ໄດ້ກັກຂະບວນລົດບັນທຸກໄມ້ທ່ອນຈຳນວນ 13 ຄັນລົດທີ່ແລ່ນຕາມເສັ້ນທາງເລກທີ 13 ເຫນືອໄລຍະແຕ່ ເມືອງຫີນເຫີບຫາເມືອງໂພນໂຮງເພື່ອກວດກາເບິ່ງທີ່ໄປທີ່ມາຫລັງຈາກຂະບວນລົດໄມ້ທ່ອນດັ່ງກ່າວເຄື່ອນຍ້າຍບໍ່ຖືກຕ້ອງຕາມເວລາຂອງ ການຂົນສົ່ງສິນຄ້າ. ເຈົ້າຫນ້າທີ່ເຊື່ອວ່າເປັນໄມ້ປະເພດຄຸ້ມຄອງປະເພດ 1,2,3 ເຊິ່ງອາດຈະມີ ຈຳນວນບໍ່ຕ່ຳກວ່າ 100 ແມັດກ້ອນ.

ອັນດັບ 9

ທະນາຄານແຫ່ງ ສປປ ລາວ ຮ່ວມກັບທະນາຄານພົງສະຫວັນ ຈຳກັດໄດ້ອອກມາຢືນຢັນວ່າທະນາຄານພົງສະຫວັນຍັງມີຖານະທາງ ການເງິນຫມັ້ນຄົງ ແລະ ປະຕິເສດກໍລະນີຂ່າວລືການຈັບຕົວ ຜູ້ອຳນວຍການໃຫຍ່ຂອງທະນາຄານ, ຊີ້ເປັນກົນອຸບາຍຫວັງມ້າງເພສະຖາ ບັນການເງິນຂອງຊາດຈາກກຸ່ມຄົນບໍ່ຫວັງດີ; ພ້ອມຮຽກຮ້ອງສັງຄົມບໍລິໂພກຂ່າວສານໃຫ້ຖືກຕ້ອງຢ່າຫລົງເຊື່ອຂ່າວລືຂອງກຸ່ມຄົນບໍ່ດີ.

ເຫດການດັ່ງກ່າວເກີດຂຶ້ນໃນທ້າຍເດືອນພຶດສະພາ ເມື່ອພໍ່ແມ່ປະຊາຊົນຊາວນະຄອນຫລວງວຽງຈັນ ໄດ້ໄປຖອນເງິນອອກຈາກບັນຊີ ຢູ່ທະນາຄານພົງສະຫວັນ ຈຳກັດ ເຖິງ 6 ພັນບັນຊີ ເປັນ ເງິນ 11 ລ້ານໂດລາສະຫະລັດ ພາຍໃນເວລາບໍ່ເທົ່າໃດວັນ ຫລັງຈາກໄດ້ຮັບ ຂ່າວລືກ່ຽວກັບຄວາມບໍ່ຫມັ້ນຄົງທາງດ້ານການເງິນຂອງທະນາຄານ.

ອັນດັບ 8

ຫໍທຳມະສະພາສະຖານທີ່ປະກອບພິທີທາງສາສະຫນາເປັນສູນລວມທາງດ້ານຈິດໃຈຂອງຊາວພຸດໃນທົ່ວປະເທດ, ພ້ອມທັງເປັນຫ້ອງ ການເຮັດວຽກຂອງຄະນະສົງທີ່ຊາວພຸດທະສາຊານິກະຊົນໄດ້ຄອງຄອຍເກືອບ 11 ປີໄດ້ສ້າງສຳເລັດ.

ຫໍທຳມະສະພາປະກອບເປັນອາຄານ 2 ຊັ້ນໂຄງສ້າງສ່ວນໃຫຍ່ແມ່ນເບຕົງເສີມເຫລັກມີລັກສະນະສະຖາປະນິກລາວລ້ານຊ້າງຫລັງ ຄາມຸງດ້ວຍຊີແພັກ, ອາຄານມີຂະຫນາດກວ້າງ 50 ແມັດ, ຍາວ 75,60 ແມັດ, ສູງແຕ່ພື້ນເຖິງຫລັງຄາ 39 ແມັດ ໂດຍມີເນື້ອທີ່ທັງຫມົດ 3.128 ຕາແມັດ ແລະ ມີຂັ້ນໄດຂຶ້ນລົງ 8 ທາງ; ໃຊ້ເວລາກໍ່ສ້າງເຖິງ 10 ປີ 9 ເດືອນ ລວມມູນຄ່າ 45 ຕື້ກວ່າກີບ.

ອັນດັບ 7

ຫໍຫລັກເມືອງວຽງຈັນ ສັນຍະລັກທາງດ້ານວັດຖຸບູຮານທີ່ຢັ້ງຢືນປະຫວັດສາດຫນ້າຫນຶ່ງຂອງຊາດລາວເຮົາ ໄດ້ມີພິທີວາງສິລາລືກກໍ່ ສ້າງຢ່າງເປັນທາງການໃນວັນທີ 24 ກຸມພາ 2010 ທີ່ບ້ານເພຍວັດ ເມືອງສີສັດຕະນາກນະຄອນຫລວງວຽງຈັນ ໂດຍມີພະເຖລານຸເຖ ລະ, ພະນະທ່ານ ຈູມມາລີ ໄຊຍະສອນເລຂາຄະນະບໍລິຫານງານສູນກາງພັກ,ປະທານປະເທດແຫ່ງ ສປປ ລາວ ໃຫ້ກຽດວາງສິລາ ລືກຝັງເສົາເຂັມຄ້ຳຄູນ.

ການສ້າງຫໍຫລັກເມືອງວຽງຈັນ ກໍ່ເພື່ອປົກປັກຮັກສາວັດຖຸບູຮານທີ່ໄດ້ຄົ້ນຄວ້າວິໄຈ ໂດຍນັກບູຮານຄະດີແລ້ວວ່າເປັນວັດຖຸປະກອບ ເຂົ້າໃນພິທີການກໍ່ຕັ້ງ ແລະ ສະເຫລີມສະຫລອງເສົາຫລັກ ເມືອງວຽງຈັນໃນສະໄຫມກ່ອນຕາມຮີດຄອງປະເພນີເກົ່າແກ່ບູຮານຂອງປະຊາ ຊົນລາວເຮົາ.

ຫໍຫລັກເມືອງວຽງຈັນແຫ່ງນີ້ ຈະຢັ້ງຢືນປະຫວັດສາດຫນ້າຫນຶ່ງຂອງຊາດລາວເຮົາ ເຊິ່ງເປັນເຫດການທີ່ເກີດຂຶ້ນກ່ອນຫນ້ານີ້ 470 ປີ ຫລື 20 ປີກ່ອນທີ່ເມືອງວຽງຈັນຈະໄດ້ຮັບການສະຖາປະນາໃຫ້ເປັນນະຄອນຫລວງຂອງອານາຈັກລ້ານຊ້າງ

ອັນດັບ 6

ຮູບປັ້ນເຈົ້າອານຸວົງ ຖືກປະດິດສະຖານແລ້ວ ເຊິ່ງພິທີປະດິດສະຖານ ແລະ ສົມໂພດອານຸສາວະລີ ເຈົ້າອານຸວົງໄດ້ຈັດຂຶ້ນຢ່າງຍິ່ງ ໃຫຍ່ໃນຕອນຄ່ຳວັນທີ 7 ພະຈິກ ເຊິ່ງເປັນກຽດຕີຄ້ອງ 9 ບາດ ແລະ ເປີດພິທີຢ່າງເປັນທາງການ ຂອງທ່ານ ຈູມມາລີ ໄຊຍະສອນ ເລຂາຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ.

ສ່ວນອະນຸສາວະລີເຈົ້າອານຸວົງປະກອບດ້ວຍ 2 ພາກສ່ວນຄື: ຮູບປັ້ນຫລໍ່ພ້ອມແທ່ນທອງ ແລະ ບໍລິເວນແຜ່ນອະນຸສາວະລີທີ່ມີລວງສູງ 14,99 ແມັດ ຖ້າເວົ້າສະເພາະຮູບປັ້ນມີລວງສູງ 8,29 ແມັດແທ່ນຮັບຮອງສູງ 5,50 ແມັດແລະ ກວ້າງ 5,50 ແມັດ ທີ່ໃຊ້ເວລາພຽງແຕ່ 4 ເດືອນເທົ່ານັ້ນໃນການປັ້ນຫລໍ່ກໍ່ສ້າງເສັດຢ່າງສົມບູນ.

ອັນດັບ 5

ທ່ານຈູມມາລີ ໄຊຍະສອນ ເລຂາຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ໄດ້ເຂົ້າຮ່ວມກອງປະຊຸມໃຫຍ່ ຂອງອົງການສະຫະປະຊາຊາດທີ່ຈັດຂຶ້ນຢູ່ນິວຢອກ ສະຫະລັດອາເມລິກາລະຫວ່າງວັນທີ 20-22 ກັນຍາ.

ໃນກອງປະຊຸມທ່ານປະທານປະເທດໄດ້ຂຶ້ນກ່າວຄຳປາໄສລາຍງານສະພາບການພັດທະນາຂອງ ສປປ ລາວ ໃນໄລຍະຜ່ານມາແລະ ທິດທາງແຜນການຕໍ່ຫນ້າ ໂດຍສະເພາະໄດ້ສະເຫນີຄວາມຄືບຫນ້າຂອງການຈັດຕັ້ງປະຕິບັດເປົ້າຫມາຍສະຫັດສະວັດ ດ້ານການພັດທະ ນາຢູ່ ສປປ ລາວ ເຊິ່ງຖືວ່າປະສົບຜົນສຳເລັດຢ່າງຫນ້າເພິ່ງພໍໃຈ. ຫມາກຜົນດັ່ງກ່າວນີ້ ຈະບໍ່ສາມາດບັນລຸໄດ້ຖ້າປັດສະຈາກນະໂຍບາຍ ແລະ ມາດຕະການທີ່ຖືກຕ້ອງ ແລະ ການຊ່ວຍເຫລືອຮ່ວມມືຂອງວົງຄະນາຍາດສາກົນ.

ອັນດັບ 4

ລະດັບນ້ຳຂອງແຫ້ງສຸດໃນຮອບ 10 ກວ່າປີ ກະທົບຫລາຍຂະແຫນງການ, ໃນຕົ້ນເດືອນມີນາລະດັບນ້ຳຂອງບົກແຫ້ງໄວສ້າງສະຖິ ຕິລະດັບນ້ຳຫລຸດລົງຕ່ຳສຸດໃນຮອບ 10 ກວ່າປີ, ຂະນະທີ່ລະດັບນ້ຳຄານຫລຸດລົງຕ່ຳສຸດໃນ 50 ປີ; ສະພາບດັ່ງກ່າວສົ່ງຜົນກະທົບຢ່າງ ຫນັກຕໍ່ການຜະລິດກະສິກຳ, ການຮັບປະກັນສະບຽງອາຫານ, ການເຂົ້າເຖິງນ້ຳສະອາດ ແລະ ຂົນສົ່ງທາງນ້ຳ.

ລະດັບນ້ຳທີ່ສະຖານີວັດແທກນ້ຳຕາມລຳນ້ຳຂອງທີ່ຊຽງແສນ, ຊຽງຄານ, ຫລວງພະບາງ, ວຽງຈັນ ແລະ ຫນອງຄາຍແມ່ນຕ່ຳກວ່າ ລະດັບທີ່ວັດແທກໃນລະດູແລ້ງປີ 1993 ເຊິ່ງມີລະດັບ ໃກ້ຄຽງສະພາບແຫ້ງແລ້ງທີ່ສຸດໃນຂົງເຂດທີ່ໄດ້ບັນທຶກໄວ້ໃນປີ 1992.

ອັນດັບ 3

ກອງປະຊຸມຄັ້ງທຳອິດລັດທິພາຄີຂອງສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ ຫລືກອງປະຊຸມໂອດສະໂລໄດ້ໄຂຂຶ້ນ ຢູ່ ສປປ ລາວ ຢ່າງເປັນທາງການໃນຕົ້ນເດືອນພະຈິກ ໂດຍການເຂົ້າຮ່ວມຂອງພະນະທ່ານ ຈູມມາລີ ໄຊຍະສອນເລຂາຄະນະບໍລິຫານ ງານສູນກາງພັກ, ປະທານປະເທດແຫ່ງ ສປປ ລາວ.

ທ່ານກ່າວໃນພິທີວ່າ: ກອງປະຊຸມໂອດສະໂລຄືຄວາມຫວັງໃຫມ່ທີ່ຈະເຮັດໃຫ້ປະຊາຊົນລາວຫລຸດຜ່ອນຄວາມສ່ຽງຈາກບົ່ມບີຕົກຄ້າງ; ແຕ່ຍອມຮັບມັນເປັນການຍາກ ເນື່ອງຈາກ 37% ຂອງເນື້ອທີ່ທົ່ວປະເທດຍັງເຕັມໄປດ້ວຍລະເບີດບໍ່ທັນແຕກຝັງຢູ່. ສະນັ້ນ ດ້ານທຶນການ ຊ່ວຍເຫລືອຈາກວົງຄະນະຍາດສາກົນຈິ່ງມີຄວາມສຳຄັນສູງ.

ສປປ ລາວ ແມ່ນປະເທດທີ່ໄດ້ ຮັບຜົນກະທົບຫລາຍທີ່ສຸດໃນໂລກຈາກລະເບີດລູກຫວ່ານທີ່ບໍ່ທັນແຕກແຕ່ສົງຄາມສາມຊາດອິນດູຈີນ ເຊິ່ງປະຊາຊົນໄດ້ກາຍເປັນຜູ້ເຄາະຮ້າຍຈາກລູກບົ່ມບີທີ່ຖິ້ມໃສ່ແຜ່ນດິນລາວເຖິງ 3 ລ້ານໂຕນ ໃນນັ້ນ ລະເບີດລູກຫວ່ານແມ່ນຈຳນວນ ຫລວງຫລາຍ ແລະ 1/3 ແມ່ນບໍ່ທັນແຕກອັນໄດ້ເຮັດໃຫ້ມີຜູ້ເສຍຊີວິດ ແລະ ກາຍເປັນຄົນພິການຕະຫລອດຊີວິດຫລາຍກວ່າ 50 ພັນ ຄົນ, ປະຈຸບັນ ຍັງສືບຕໍ່ມີຜູ້ໄດ້ຮັບເຄາະຮ້າຍສະເລ່ຍ 300 ຄົນຕໍ່ປີ.

ອັນດັບ 2

ກອງປະຊຸມສະໄຫມສາມັນເທື່ອທີ 10 ເຊິ່ງເປັນກອງປະຊຸມ ທ້າຍສະໄຫມຂອງສະພາແຫ່ງຊາດຊຸດທີ VI ໄດ້ອັດລົງດ້ວຍຫມາກຜົນ ອັນຈົບງາມຕາມຈຸດປະສົງແລະ ລະດັບຄາດດ້ວຍການຮັບຮອງເອົາບັນຫາສຳຄັນຂອງຊາດຈຳນວນຫນຶ່ງ.

ເປັນຕົ້ນກອງປະຊຸມໄດ້ຮັບຮອງເອົາ ທ່ານ ນາງ ປານີ ຢາທໍ່ຕູ້ກຳມະການກົມການເມືອງສູນກາງພັກ ເປັນປະທານສະພາແຫ່ງຊາດຄົນ ໃຫມ່ ແລະ ທ່ານ ທອງສິງ ທຳມະວົງ ກຳມະການກົມການເມືອງສູນກາງພັກເປັນນາຍົກລັດຖະມົນຕີແຫ່ງ ສປປ ລາວ ຄົນໃຫມ່.

ອັນດັບ 1

ພິທີສະເຫລີມສະຫລອງນະຄອນຫລວງວຽງຈັນ ຄົບຮອບ 450ປີ ແລະ ສະຫລອງວັນສະຖາປານາ ສປປ ລາວ ຄົບຮອບ 35 ປີໄດ້ ຈັດຂຶ້ນຢ່າງຍິ່ງໃຫຍ່ລະຫວ່າງວັນທີ (1521 ພະຈິກ 2010).

ພິທີເປີດຢ່າງຍິ່ງໃຫຍ່ຕະການຕາໄດ້ມີຂຶ້ນໃນຄ່ຳຄືນຂອງວັນທີ 19 ພະຈິກ 2010 ທີ່ສະຫນາມກີລາແຫ່ງຊາດຫລັກ 16 ໃຫ້ກຽດເຂົ້າ ຮ່ວມໂດຍທ່ານ ຈູມມາລີ ໄຊຍະສອນ ເລຂາຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ພ້ອມດ້ວຍຄະນະການ ນຳເຂົ້າຮ່ວມມີບັນດາຄະນະຜູ້ແທນຈາກນະຄອນຫລວງ-ບັນດາແຂວງໃນທົ່ວປະເທດແຂກບັນດາປະເທດເພື່ອນມິດ 31 ຄະນະຕົວແທນ ພີ່ນ້ອງເຊື້ອຊາດລາວທີ່ດຳລົງຊີວິດຢູ່ຕ່າງປະເທດຈາກ 9 ປະເທດ ຈຳນວນ 214ຄົນພ້ອມດ້ວຍປະຊາຊົນລາວເຂົ້າຮ່ວມ 11.700 ກວ່າ ຄົນ.